Mesire Jacque Viat prebstre curé de Suarce
at deposé en sa bone conscience sur la traite
à luy faicte, que, s'estant plusieurs fois
pourmené avec son arquebuse par la
campagne et passé par sur l'estang de
question, tant avant la moison que
après, il at recognut plusieurs
fois qu'il y avoit fort peult d'eau, et
qu'un homme n'y fust venu iusques demy
iambes, mesme que s'il fusse esté eslevins
q'ascheurement les elevins fussent mort ;
touchant la chassie, dit n'avoir print
garde s'il y at du mancque ou non.

Adam Lorense de Suarce eagé d'environ
45 ans par serement dit et depose
que la presente anné, fesant du foing
proche l'estang de question, en passant
q'il vit l'estang quassi tout vuide et
qu'il y avoit fort peult d'eau, et voullant
veoir quel manque il y avoit
allat sur la chassie où il vit
un trou droit sur le cor, de la
grosseur d'un penaulx,
ne scachant s'il passoit la chassie.
Lequel en advertit Louy de Suarse,
croyant que ses cousin de Rechesit
le tenoient encor par admodiation.
Dit en oultre que à la requeste
de Pierrat Gariat le vint treuver
il y a environ trois sepmaines pour
visiter ledit estang, où qu'estant il
le trevirent tout plain d'eau, sans
qu'il soit esté racomodé, et qu'il
ne coulloit point du tout, sinon fort
peult.

Nicolas Millart de Suarse sur la
traicte à luy faicte, eagé d'environ
30 ans, par serement dit et depose,
touchant l'estang de question que, le
caresme passé, avant que l'on allat à
la charue, il s'en allat dans ledit estang
faire de la bochure (1), et vit bien
que l'on avoit racomodé un trou proche
du cor, n'y ayant toutefois ...
pesone (?), en ayant adverty Nicolas Monier
que l'on racomodoit bien l'avandit estang,
luy dit que s'estoit ceulx de Rechesit,
qu'il ne fessoient guere chose qui vaille ;
dit en oultre que plus d'un mois
après, il allat querir
sa bochure, où qu'estant arrivé il
trevat l'estang quassi tout vuide,
dans lequel il y avoit fort peult
d'eau, et quant se fust la saison de
couper des lien pour lier le grain,
il en faist couper dans l'avandit estang
et qu'il y avoit encor moings d'eau
que la premiere fois.

Jacque Pelletier de Suarse eagé d'environ
37 ans par serement dit et depose
qu'estant plusieurs fois passé par dessus
l'estang de question avant et après
la moison avec le bestial de Suarse
qu'il gardait, il ne l'at point
veut plain d'eau, toutefois qu'il y
en avoit tousiours quelque peult,
mais après moison avec moings que
devant, les loup ayant desrobé
un couchon S. H. auquel il le furent
rependre tout au millieu dudit
estang, dit en oultre qu'il at tousiours
veud un trou dans la chasié dudit
estang assé gros, ne scachant s'il passoit,
et que depuis ses grandes pluyes il y
at environ cinq sepmaines l'avandit
estang estoit tout plain d'eau, et l'est
encor presentement.

Blaise Mahon de Chavatte eagé d'environ
35 ans, par serement dit et depose,
touchant l'estang de question qu'il est
passé plus de cinquante fois depuis Noel
passé par sur la chasie d'icelluy
avant et après moison, travaillant
à St. Ulrich que s'estoit son chemin, qu'il
ne s'est iamais print garde qu'il y heut
d'eau dedans, sinon que depuis
ses grandes pluyes il y at environ
un mois, allant au moulin à St. Ulrich
il vit ledit estang tout plain d'eau.

Jacques Hasenate de Rechesit eagé d'environ
40 ans par serement dit et depose que,
la caresme passé, prenant son chemin contre
Chavane, sortant de l'eglise de Suarse, Dame Catherine
de Chavanate le priat de dire un
peult à ceulx qui tenoient
leurs estangs du Peront, qu'il le deussent
venir racomoder, au default que l'on
les rechercheroit pour la pesche ;
estant arrivé au lougis, il envoyat sa
feme ches Germain Gariat, laquelle
le dit à la femme dudit Germain, et
plus n'en dit.

Richard Girard de Rechesit eagé d'environ
35 ans par serement dit et depose
que, s'en retournant contre Rechesit,
de veoir un estang qu'il avoit admodié
de Gorge Koetelach, clochié à Dellemont
environ les festes de Pasque passé, passant
à Chavanate, Dame Catherine de Chavanate
l'apellat, le voullant mener au lougis,
et n'y voullant entrer, elle, avec ses
freres le prierent leurs voulloir faire
un service de dire à ches eue (?) et ceulx
qui avoient admodié leurs estang
du Peront qu'il devoient venir pour
le racomoder, ce qu'il leur promit,
et estant arivé au lougis, le dit
à Germain Gariat soubs le tillot,
et à Nicolas Schellet devant son
lougis.

(Déposition en allemand de Georges Graff.)

Entre Monsieur Ruedolff de Chava(na)tte
demandeur, contre Pierrat Gariat de
Rechesit deffendeur P. O. (2) mesme les
tesmoings sur ce debhuement assermenté
et examiné, pour consideration movantes,
le juge at print advis, sousoyant
les myssions.

(1) bochure : peut-être pour bouchure : perches de bois servant à boucher (clôturer) un pré.

P. O. : partie ouïes.