Sur le 6è septembre 96 furent envoyé encor
le sr prevost et mreborgeois Jolipied à Landtag
tenu à lieux de Friborg que demeurarent iusques à 21è
dudit moy, estant envoyés en nom de la ville et seigneurye
por faire et prester sermen en nom que devant, lors que
treshault et trespuissant prince archeduc Mathias y arryvit por et
en nom de la maiesté Imperyalle recepvoir le sermen
de fidelité de tous les estats, où estant congregé
Sur le 11è dudit moy futt proposé par ledit Archeduc Mathias
que par le decès et trespas de feu laudable memoyre Ferdinande
archeduc d'Osteriche son oncle et notre iadis seigneur et prince,
por n'avoir laisser heritiers masle auxquels le droict hereditayre
peussent tumber lesdits pays d'Osteriche, qu'ainsi seroyent
escheu lesdits pays aux aultres princes d'Osteriche,
comme à ladite maiesté Imperyalle et ses freres et
cousin fils de feue laudable memoyre Charle leur oncle.
Et que, por et affin de ne laisser lesdits pays sans prince,
il avoit charge expresse apparissoit par ungne procuration
et commission suffisante de ladite maiesté Imperialle,
por et en nom d'iceluy recepvoir le sermen de fidelité
tant à sadite maiesté que aultres princes cointeressés,
requerant pour l'effect de ce le dessain et resolution desdits estats,
promectant dés le de faire à confirmer toutes franchises et
libertés desdits pays comme aussi de faire devuyder les
griefs du pays.
À quoy futt après advis heu respondu par lesdits estats
que, comme de toutes anciennetés estoit esté observé ès
pays d'Asteriche que avant faire ledit sermen à ung
prince, il debvoit confirmer et approuver toutes libertés
et franchises des villes et pays, dont por observation
desdites bonnes et laudables costumes se paroffrèrent
lesdits estats faire ledit sermen, sadite maiesté ayans faict et envoyé
lesdites confirmations, où en
tant que l'election depuis deutt venir sur l'ung des aultres
princes d'Asteriche, que le serment faict à ladite maiesté
sera imputé et se réferera sur iceluy esleu à tant qu'il
futt faict à sa propre personne, qu'est por
exempter lesdits pays de missions et interrest, à
condition qu'il luy pleut faire les meismes confirmations
que seroient esté faictes par sadite maiesté,
prians por ce qu'il pleust à luy archeduc Mathias
surceoir ce faict iusques par eux unganimement
sera nommé absoluement ung prince, et aussi vouloir
establyr et constituer ung ballif à pays, ce qui futt
accordé et parainsi conclue ladite dyette en attendant
la resolution de sadite maiesté et les commissaires pour
recepvoir lesdits sermens.