Ma dite dame a en la ville d'Estueffont, sur la riviere dudit lieu,
ung molin qui longtemps avoit esté en ruyne, lequel
a esté novellement reffait tout à nuef ; pour l'année commenceant
le premier jour de janvier 1415 a esté admodié à
Varnier Joli, mugnier 10 quarris d'espiote, mesure de
Moisonval, dont les 7 font un bichot,
mesure de Belfort ; pour ce :: 10 quarris espiote, mesure de Moisonval.

Ma dite dame a en ung molin assis en la ville d'Anjustin
sur la riviere dudit lieu la moitié, partant aux signeurs
de Rope, et est admodié pour la dite année fenie à la
saint Martin d'Iver 1415 à Garnerey & Broquin de
Betonvellié, en oultre 2 livres cire, 9 quarris soigle, mesure
de Moisonvaul, et font les 5 un bichot, mesure de Belfort.
Pour ce, pour la moitié appartenant à ma dite dame ::
4 quarris demi soigle et une livre cire.

Les habitans d'Estueffons doivent le banvin qui dure dés la
feste de Nouel jusques à la Saint Ylaire (1), ouquel terme
ilz doivent vendre à leur despens, et faire vendre
par aucune personne qu'ilz eslisent, une
cherre de vin qui contient 20 tines, & la tine 32
channes que l'on doit bailler du vin de madite
dame, lequel vin ilz sont tenus de aller querire à leur
missions la où il plait à ma dite dame ou à
ses gens, et leur doit l'on charger sur leur chare
& donner à ceulx qui le vont querré au chargier
ung quartaul de vin qui fait 4 channes, et
du pain, & auxi les doit l'on esquicter de touz
paiaiges qu'ilz pourront devoir pour mener ledit vin
audit lieu, et aussi du treu que ma dite dame prant
sur le vin que l'on appelle le langal, et doivent
avoir les prudommes qui eslisent & mectent celli qui
vent ledit vin 4 channes de vin &, jusques ledit vin
soit vendu, aucun de la dite marie ne puet ou doit
vendre vin en icelle, et doivent vendre unechacune
channe de vin à plus grant pris de 1 denier que l'on ne
vent lors en la ville de Moisonvaul ou
de Rougemont et en la terre, et le proffit desdites
20 tines ainsin vendues lesdits habitans doivent paier
audit terme de la saint Ylaire, et ou cas qu'il
ne plait à ma dite dame ou à ses gens de bailler
ladite channe de vin, lesdits habitans li doivent paier pour
chacune channe de vin 1 denier qui vaut par an, lesdites
20 tines :: 53 sols 4 deniers obole baulois.

Madite dame a en ladite ville ung droit appellé
le langal qui est tel que tous vins que l'on
vent en menu (2) à taverne, celli qui le vent li doit
pour chacun muy 4 chanes de vin, et contient
le muy 3 tines, et la tine 20 chanes (3), lequel
droit se admodie chacun an au plus offrant, et est
admodié pour cette presente année commenceant à la saint
Ylaire 1415 à Jehan Caresme :: 20 sols baulois.

(1) soit pour une période de 3 semaines.
(2) au détail
(3) paraît contradictoire avec le paragraphe précédent, où la tine était mesurée à 32 chanes