Les habitans de la dite marie où il n'a que la dite ville
de Bur sont hommes de Belfort de toutes justices
haulte, moyenne & basse, taillables à volonté
deux fois l'an en caresme & en vain, et sont
de morte main, et doivent tenant feu ou
qui paie plus de 12 deniers à chacun terme une geline,
toutes courvées, la monstre des hommes, l'ost, la
lance & la chevauchée, & pourtent lettres où il pleut (1)
& toutes fois que l'en leur commende, et ont acoustumé
de paier par an 7 livres bauloises par moitié èsdiz
termes de caresmes & de vain, et sont les parties
escriptes cy après commenceant folio 63 ; pour ce lesdites
tailles d'un an :: 7 livres bauloises.

Item pour leurs gélines, et sont 11 paiens (2)
d'icelles tailles dont les 3 ne tiennent
point de feu et ne paient que 12 deniers, pour
ce, pour le residu, et pour 8, comme appert
par lesdites parties :: 8 gélines.

Les enffens Estevenin Burnot, autrement Pichelet,
dudit lieu de Buc doivent chacun an à ma dite dame
de cense audit terme de saint Martin d'iver une livre
de cire sur leur mex et appartenances, appelé le mex
de feu Huguenin Dupesqui, sceant audit lieu
de Buc ou finaige & territoire d'icelle, entre le mex
desdiz enffens d'une part & le mex qui fuit Jehan
Pertusot que tiennent à present lesdiz enffens d'autre part ;
pour ce :: une livre cire.

La justice de la dite marie est gouvernée par le maire
dudit lieu, et sont les emendes de 7 sols, 36 sols
& 72 sols, tout par la forme & maniere que contenu
est cy dessus ès autres maries de la chastellerie de
Belfort.

Les habitans de la dite marie doivent avec les autres
habitans des maries de la terre de Belfort le bois
pour affouer & chaufer ou chastel dudit Belfort
le signeur ou son capitaine demourant en icelli et
en ont paier pour l'an feni 1415
tout ensemble :: 50 livres baulois.

(1) où il pleut : où il plut (du verbe plaire).
(2) paiens : payant.