Les habitans de la dite marie de Betonviller où sont les
villes qui s'ensuiguent c'est assavoir Betonviller dessus, Betonvillers
dessoubz (1), la Colonge, Anguelamme (2) sont hommes de
Belfort de justice haulte, moyenne & basse,
taillables à volonté deux fois l'an en caresme
& en septembre, et doivent toutes courvées & charrois,
la lance, l'ost & la chevauchée & pourtent lettres toutes
fois que l'en leur commende, & chacun tenant feu à caresme
une geline, et ont paié pour le terme de vain darrenier
passé 1415, et appert par les parties escriptes cy
après commenceant folio 61, 13 livres 10 sols baulois ; pour ce, pour les 2 termes :: 27 livres.

Lesdiz habitans qui sont 28 paiens (3) desdites tailles
doivent chacun tenant feu au terme de caresmentrant
comme dessus est dit une geline, et sont 12 qui
ne tiennent point de feu, comme appert par lesdites
parties, ainsint demore 16 qui doivent chacun une geline :: 16 gelines.

La justice de ladite marie est gouvernée par le maire
dudit lieu, et y sont les emendes de 7 sols, 36 sols
& de 72 sols, tout par la forme & maniere que
contenu est cy dessus ès autres maries de la
chastellerie dudit Belfort.

Les habitans de la dite marie doivent avec les autres
(autres) habitans des autres maries de la terre
dudit Belfort le bois pour affouer ou chastel
dudit Belfort le signeur ou le capitaine demorant
en icelli, et en ont paié pour l'an feni 1415
touz ensemble 50 livres baulois.

Le molin dudit Betonviller sceant sur la riviere de
Colonge est à ma dite dame, et n'est point
bannaul, et est admodié pour ung an commenceant
le premier jour de janvier 1415 à Jehan
Boudat 3 bichots avene mesure dudit Belfort & 3 livres
de cire ; pour ce :: (id)

Ma dite dame a sur les habitans de ladite marie
droit qui est tel c'est assavoir que, se aucun d'eulx vendit
son heritaige par entier, elle doit avoir le tiers denier
de ce qu'il seroit vendu, lequel droit pour l'an passé
ne vaillu aucune chouse pour ce que le cas n'y
est point advenu.

(1) Bethonvilliers dessous : peut-être Menoncourt ?
(2) Anguelamme : Éguenigue.
(3) paiens : payant.