Le four de Bavelié est, c'est assavoir la moitié de Belfort, et l'autre
moitié est aux signeurs d'Exers, et est bannaul
auxdiz habitans, et se admodie chacun an, tant pour
ma dame comme pour lesdiz signeurs d'Aixer chacun
signeur sa part, et celli qui l'admodie à acoustumé
de paier & avoir de 20 pains l'un, et se il
venoit jusques à 23 il n'en auroit que ung,
mes se il croissoit ou descroissoit ledit fournier
en auroit selon le croissement ou descroissement,
et doivent ceux pour cuil ledit four cuyt bailler
& livrer bois pour le chauffer, et a esté
admodié pour l'an feni à la saint Ylaire 1415
et c'est assavoir la moitié appartenant à ma dite dame à
(Orriot ?) dudit Bauvelle 30 quartes gros frement
tel comme il vient au lieu et une livre cire ; pour ce :: 30 quartes frement mesure dudit Belfort, une livre cire.

Le droit deu en la dite marie en lieu & pour la dite morte
main dont ilz sont estés affranchiz comme dit est,
qui est appelé le vot, lequel est tel que, se
aucun d'eulx va de vie à trespassement senz hoirs
qui a lui deust succeder se la morte main y fuest,
le signeur dudit Belfort doit avoir des biens de sa
succession une beste, ung de ses autres meubles
ou 5 sols estevenants, lequel qu'il le plait, ou à ses gens,
et auxi que se aucuns d'eulx aloit de vie à trespassement
senz avoir parent prouche demourant en la dite terre
soubz ledit signeur de Belfort et de leurs hommes,
lesdiz signeurs avoient l'eschoite ainsint & par la
maniere que se morte main y estoit, et a baillé
pour l'an passé feni le darrenier jour de decembre 1415
pour une femme nommée Villette la
Faurete qui trespassa environ la saint Martin d'iver
1415, de laquelle l'on prit une rope
de pers (1), pour ce qu'elle n'avoit pas pooint de
beste ne meilleur meuble, laquelle fuit vendue
au marchant dudit Belfort :: 16 sols balois.

Broquin de Banvellié doit de rente chacun an au
terme de saint Martin d'iver pour franchise 2 livres
cire & 2 gelines ; pour ce :: (id).

(1) rope de pers : robe d'un drap (ou le drap lui-même) de couleur bleue