La riviere dudit Chastenay est à ma dite dame, et est bannal
dés certains termes et limites qui y sont, et ne la vit l'on
onques vendre ne admodier au proffit du signeur, excepté
une fois que le tresourier dit qu'elle fuit admodiée 9 florins,
mas a esté tousiours en gouvernement des chastellains de
Belfort, lesquelx laissent la pescherie d'icelle à ung
pescheur, lequel il puet peschier et du poisson faire
son proffit, parmi ce qu'il en devoit au chastellain chacune
sepmaine ung service de poisson & en caresme le double
& auxi en devoit servir toutes les vigilles & quartans
de l'an, et puet valoir chacun service 3 sols baulois.

Jehan de Bontans doit de rente chacun an au terme de saint
Martin d'iver 3 livres cire et parmi ce se dit estre frans ;
pour ce :: 3 livres cire.

Le prieur de St Anthoine de Froidevaulx doit chacun an
de rente audit terme, sur le mex Hugues de Bontans
sceant audit lieu, où il appartient environ 15 journaux
de terre & 2 fauchées de prey :: 4 livres.

Item doivent les habitans de la dite ville de Chastenay
c'est assavoir ceulx qui ont bestes trahans à charrue
pour chacune, chacun an, demie quarte blef gros frement
tel qu'il vient au lieu, mesure de Belfort, et
est appellé ce droit le blef de charruaige,
lequel droit, pour l'an feni le darrenier jour de decembre
1415, par la relacion du maire, pour 19 bestes
trahans a vaillu :: 9 quartes demie frement mesure de Belfort.

(vue 16 d)
En la dite marie de Chastenay ma dite dame a ung
droit que l'on appelle le langal qui est tel que tous
ceulx qui vendent vin en ladite marie le doivent
pour chacun muy 4 channes de vin, et coutent le muy
3 tines & a esté admodié à Jehan Garnier dudit
Chastenay pour l'an fini à la saint Ylaire darrenier passé
1415 30 sols baulois, et est admodié pour ceste
presente année commenceant à la dite Saint Ylaire l'an que dessus
à Regnault Colin dudit lieu :: 50 sols estevenants.