L'an mil quatrecent cinquante huit le jour de la feste Saint Martin
d'ivers fut laissé la tielliere par Huguenin de Chermoy, maistre bourgeois et
par les aultre du conseil à Jehan Roulin, bourgeois de Belfort, par le
terme et espace de trois ans encommançant le jour dessusdit
et finissant lesdits trois ans revoluz, pour le pris et somme
de douze livres balois, rendre et paier chacun an ès
gouverneurs de la ville, lesdits trois ans durant soixante sols
à chascun quartemps, et est obligé ledit Jehan Roulin de
faire bon, leal et competant ovraige, et amolé (?) souffisamment
au regart d'ouvrier (?), tant de tielle comment de quarrel,
et ne luy doit l'on donner nulz aissement quelcunques,
et doit randre la grange et le fourt en tel estat
ou en meilleur que le jour qu'il l'y entray, et doit
bailler à la ville toutes et quantefois qu'elle en aura
besoint le millier de tielle pour quarante et le
bichat de chaulx pour quatre solx, et le cent de quarrelz
pour trois solx, et la tielle coppée pour quatre deniers
la piece, et (at ?) baillé Huguenin de Chermoy, maistre
bourgeois audit Jehan Roulin 22 cent d'essandretes sus
quoy l'on met les tielles essuiez et quatre vint lavons,
lesquelx ilz doit randre au bout desdits trois ans au
maistre bourgeois qui sera pour lors, et doit pour ladite
somme de douze livres au terme dessusdit, et de ce se sont obligés
Vuilemlin Roulin, frère dudit Jehan Roulin et Huguenin Demoingey,
de l'auctoritey de Demoingey son père, pour leurs [pour eux] et pour
leurs hoirs, et chascun d'eulx pour soy et pour le tout.
Ce fut fait l'an et jour que dessus par ledit Huguenin
de Chermoy, maistre bourgeois, Jehan Tabellion, Jean Ruedol
Huguenin Fertay, Jaquat Garrant, Jehannenat Moillesal,
Richard Begnin, Perrenat Estroictat et Jehan des
Bombardes, et Jehan de Derney pour le commun.