Claudot N. residant presentement à Tornach
at remonstré qu'ayant esté treuvé en son
jeune eage en ung bersseau
devant ceste ville et noury et elevé
par Mre Pierre Clavey, ne scachant
qui estoit son pere ny sa mere, prie
voulloir entendre les tesmoins qu'il
entend produire, et leur impartir lettre
testimoniale du faict susdit pour s'en
servir tant que de raison, que luy at
esté ouctroyé, et sur ce sont estez
examinez par le serement qu'ilz ont à la
ville de bourgeois à eulx renouvellez
comme s'ensuit.
Mre Pierre Clavey depose qu'il y at
environ trente quatre à trente six ans
qu'il est souvenant qu'ung pauvre garçon
eagé d'environ deulx ans et demy fut
treuvé seul deans ung berceau devant
ceste ville tout seul, tellement voyant que
personne ne le repetoit et estoit
d'aulcune assistance, messieurs de l'hospital
Ste Barbe le feirent conduire audit hospital,
a quelques ans après ledit deposant
(devenu ?) recepveur, et voyant ce pauvre
garçon il le nourrit entretenu et
envoya à l'escole, iusques il fut ung
grand ... qu'il l'envoya en l'Alemaigne
chercher sa bonne fortune, recognoissant
ledit Claudot encore pour tel et
avoir esté ce pauvre garçon qu'il avoit
nourri et s'estre iceluy tousiour
bien et dehuement comporté sans
reproche.
Anthoine Vernier depose qu'il est bien
souvenant lors que ledit Claudot fut
treuvé et mis en l'hospital où pour
lors sa mère estoit gardienne et
est bien souvenant qu'il at esté nourry
audit hospital avec ledit deposant et
mesme que depuis Mre Pierre Clavey
estoit recepveur dudit hospital (s'esleva ?)
et le recongnoit encore tout maintenant
pour tel, s'estant iceluy tousiours bien
comportez et de bonne conduite.
Jean Jacques Finguet dit qu'il demeuroit
du temps que Mre Pierre Clavey estoit
recepveur de l'hospital le pere dudit
deposant residoit audit lieu et se souvient
bien qu'il y avoit ung garçon qui avoit
esté treuvé devant la ville qu'on avoit mis
audit hospital, qu'on nommoit Claudot
qui alloit mesme à l'escole avec
ledit deposant, ne scachant toutefois à
la verité si c'este ce mesme qui repete
ladite attestation.