Edition d'un acte

Nous Mathée Viron du Vaidoie accompaignée de Jehan Crestien mon frere, de Hugate sa femme legitime et d'aultres noz parens, amis charnels d'une part, et Jehanneney Piequet d'Offemont, père de Jehannete ma fille legitime, aussi accompaigné de plusieurs mes parens et amis charnels et acquis pour et au nom de ladite Jehannete ma fille et moy en ceste partie faicent forte d'elle ladite Jehannete ma fille d'aultre part, avons faiz et faceons entre nous les traictiers des mariage suigans & aultres. Premierement nous lesdits Mathée et Jehan Crestien frères pour p...r audit mariage avons traicter, accorder traictons et accordons entre nous que nous partirons entre nous par parties et porcions equales et partages egalz tous & singuliers noz maix et herictages que nous lesdits freres avons ensemblez ès ville, fin, finage et territoires tant de Belfort, du Vaidoie que à son de la cloche dudit Belfort, & aura chacun de nous la moittié tant en champs, prelz, oches, curtif, gagiere ... en tous aultres herictages, sans neulx excepter, reserver ne retenir, exceptée et reservée la maison de Belfort qu'est competé et appartient à ladite Hugate. Et je ledit Mathée ay promis & promectz les foy et serements de mon corps pour ce donner aux mains du notaire tabellion cy après nommez de prandre à leal femme et expouse ladite Jehannete fille dudit Jehanneney se dieu, saincte eglise, et la loy de Rome s'il acorde Et je ledit Jehanneney père ay aussi promis et juré comme ledit Mathée de procurer [?] en effect que ladite Jehannete ma fille prandra à leal mari & expoux ledit Mathée, se dieu, saincte eglise et la loy de Rome s'il accordent. Et premierement nous lesdites parties en effectz et chacune de nous en droit soy que ledit mariage sera accomplie et solemnizée en notre mere saincte eglise à plustost que bonnement faire pourrons. Item et en contemplacion duqueldit mariage, je ledit Jehanneney pere a promis de donner et donne à ladicte Jehannete ma fille la somme de dix libvres balois monnaie courant à Belfort. Et ledit Mathée d... et a promis de douher ladite Jehannete sa femme advenir de cinqt libvres balois monnaie que dessus, lesquelles dix libvres de mariage et cinqt libvres de douhaire lesdits Marhée et Jehan Crestien son frère assigneront et seront actenuz d'assigner bien et souffisamment sur bons et souffisans assignaulx quant recephuz les auront à ladicte Jehannete femme dudit Mathée sur bons et souffisans assignalx de francs alieu, après et incontinant que ledit Mathée recephuz les aura. Item ont promis et accordez lesdits Mathée et Jehan Crestien frères de donner à ladicte Jehannete une beste en valleur de trente & ung solz balois monnaie que dessus pour par icelledicte Jehannete en faire sa voluntée, promectant lesdictes parties et chascune d'icelles les foys et serements de leurs corps pour ce donnée et touchés par eulx et chacun d'eulx corporel- lement aux mains du notaire tabellion ci après nomméez solemnee et legitimes stipulacion sur ce entrevenans et soubz les expresses ypotheques obligacions de tous et singuliers nos biens et biens de nos hours, ayans causes, meubles et immeubles presans et advenirs, acquis et à acquerir quelcunques avoir, tenir, garder, observer, faire accomplir et entermet toutes & singuliers les choses que dessus et chascune d'icelles, soubz les expresses et ypotheques obligacion de tous et singuliers nosdicts biens et biens de nos hoirs, meubles et immeubles presens et advenirs, acquis & à acquerirs quelcunques avoir, tenir, garder, observer entierement tout le contenuz à ces presentes lettres, sans jamais faire, dire, aller, venir ne consentir faire, dire, alleer ou venir tacitement comme expressement au contraire, non obstans aucunes excepcions de fait, de droit, stile, us ou coustumes adce contraires, à quoy nous lesdictes parties et chacune de nous avons expressement renuncé et renunceons par ces presentes et au droit disant generale renunciacion ne vault se l'especialle ne precede. En tesmoingnage de quoy nous lesdites parties et chacune de no... tant que ledict fait noz touche compete, appartient, peult & doit touchier, competer et appartenir avons prié, requis et obtenuz le seel duquel l'ong use à territoire et tabellionney de Belfort estre mis et appenduz à ces presentes lettres que furent faictes & données audict Belfort le quinzieme jour du mois de juing l'an nostreseigneur courant mil quatrecens soixante et huit, presens Richart filz Richart dudict Offemont, bourgeois de Belfort, Vuillemin Raisselin, de Pérouse, Jehan Clerc bourgeois dudit Belfort, Bourquin Bichet d'Andelenans, Perrin Brisejon dudict Vaidoie, Henry Piequet frère dudict Jehanneney, Jehan filz Claude Pillart dudit lieu, et plusieurs aultres tesmoins adce appellés specialement et requis. Et car vray est que feu Jehan Tabellion alias Picabo à son vivant notaire tabellion dudit Belfort qui les lous [?] et contrancts des presentes a receu inscript & registrer en ses registres & prothocolles comment appert par iceulx, et les lettres de & sur ce ply grossoyées et expédiées aux parties, scellées du seel dudit tabellioney sont estée perdues par le feugz qui nagaire a bruller Belfort ou aultrement, comme à nous, Guillame Belhoste, prevost, Jean Berthin d'Andelnans, maistre bourgeois, Regnaudt Prevost, Jehan Thoyart, Jehan du Maingny, Jacot Hoingney & Pierre Estroitat, tous du nombre des neuf bourgeois juriés consceillers de la ville dudit Belfort, a apparuz et appert ; par le serement dudit Mathée judicialment fait par devant nous, querrant icelles regrossier, lequelzdit Mathée a fait le serement en telz cas appartenant, par quoy est estée ad...gié, dit & ordonnez au tabellion subscriptz lesdites lettres estre regrossiées, rendues & restituées audict Mathée par & cuoncernant les sallaires dudit tabellion & vins desdicts prevost & bourgeois raisonnable & accoustumée, faictes & donnée quant à ladite regrosse ... de Belfort le mardy veille saint Pierre en chayrre vingt & ungthyeme jour du mois de fevrier l'an mil quatre cens septante & ung, selon le stile de la court de Besançon.

#	situation	nom	prénom	civilité	sexe	surnom	âge	résidence	origine	infos
1	époux	VIRON	Mathée					Valdoie
2	épouse	PIEQUET	Jehannette					Offemont
3		VIRON	Jean Chrétien					Valdoie		frère de #1
4		PIEQUET	Jehanneney					Offemont		père de #2
5	témoin à l'original	D'OFFEMONT	Richard					Belfort		fils de #6
6	témoin à l'original	D'OFFEMONT	Richard					Belfort
7	témoin à l'original	RAISSELIN	Vuillemin					Valdoie
8	témoin à l'original	CLERC	Jean					Belfort
9	témoin à l'original	BICHET	Bourquin					Andelnans
10	témoin à l'original	BRISEJON	Perrin					Valdoie
11	témoin à l'original	PIEQUET	Henry							frère de #4
12	témoin à l'original	PILLART	Jean					Valdoie		fils de #13
13	témoin à l'original	PILLART	Claude					Valdoie
14	rédacteur de l'original	TABELLION	Jean		(fe	alias Picabo		Belfort		notaire
15	témoin	BELHOSTE	Guillaume					Belfort		prévôt
16	témoin	BERTHIN	Jean					Belfort	Andelnans	maître bourgeois
17	témoin	PREVOST	Renaud					Belfort		conseiller
18	témoin	THOYART	Jean					Belfort		conseiller
19	témoin	DU MAINGNY	Jean					Belfort		conseiller
20	témoin	HOINGNEY	Jacot					Belfort		conseiller
21	témoin	ESTROITAT	Pierre					Belfort		conseiller

Dépôt d'un commentaire