Cet acte a été dépouillé par l'association LISA (Lecture et Informatisation des Sources Archivistiques du Territoire-de-Belfort)


Type : terrier : charges.
Date : 1415
Cote : B 503
Rentes redimables (II)
Transcription :
Auxdiz hoirs de feu messire Pierre de Cly auxquelx sont deuz
chacun an de rente sur les rentes et revenuz desdiz
Belfort & Rosemont la somme de 240 fors florins qui
de present vaillent la piece comptant pour 22 sols baulois, et
les 20 sols baulois mis à livre tournois vaillent 220 livres tournois,
à 2 termes, c'est assavoir la moitié à la feste de saint George
et l'autre moitié à la feste de saint Martin d'iver, laquelle
rente de 240 florins messrs les duz d'Osteriche vendirent
ja pieça audit feu messire Pierre de Cly pour le pris
& somme de 3200 fors florins (1) et iceux assignant
sur les rentes & revenuz desdites chastelleries de
Belfort & de Rosemont, à paier chacun an perpetuellement auxdits
deux termes par moitié ; duquel vendaige ledit feu
messire Pierre leur donna rachat et retracion perpetuels
c'est assavoir que toutes fois que lesdiz duz, leurs hoirs,
successeurs & haiens cause d'eulx ou temps advenir
paioient pour une fois à lui, ses hoirs, successeurs
& ayens cause de lui ou temps advenir ladite somme
de 3200 fors florins, lesdiz duz, leurs hoirs,
successeurs & haiens cause d'eulx par lors devroient
avoir lesdiz 240 fors florins d'iceulx seroient
& demeuroient quictes ensemble lesdiz assignaulx
et autres ploiges & hostelaiges pour ce mis,
baillés & assignez, se aucun en y avoit, et depuis
ledit feu messire Pierre de Cly ycelle rente de 240
fors florins bailla & delivra à dame Frene de
Tiestain nommée dame d'Asue sa femme pour assignal
de son mariage ou pour douaire, laquelle
dame nagaires d'icelle rente de 240 fors florins
à elle ainsint deue en a mis ès mains & baillé
à damiselle Agnelin sa fille, femme de Holemant
de Moisonval, escuier, la somme de 100 fors florins ;
par ainsint de present est donc icelle rente
à la dite dame Frene & à la dite Agnelin sa fille,
c'est assavoir à la dite dame 140 fors florins, et à sa
dite fille 100 fors florins, et ainsint l'a dit & rapporté
auxdiz commis ledit Claux, et dit en oultre qu'il
leur est deu de arreraiges de temps passé
c'est assavoir à la dite dame pour le terme de saint
Martin d'iver passé 70 fors florins et à la dite
Agnelin sa fille ( ) ; pour ce :: 240 fors florins

Ledit Olemant a dit devant monsr. de Montagu (3) qu'il li estoit deu
d'arraiges de la dite rente, c'est assavoir de la part que sa femme y prant
une grant somme d'argent qu'il extime à 300 livres, et pour ce y
semble qu'il seroit bon que le tresourier de ma dite dame &
auxi le receveur qui ont esté ou temps passé feussient
mandez pour compte pour veoir & savoir comment icelle
rente a esté paié car ledit tresourier a dit èsdits commis que
riens n'en estoit deu d'arraiges du temps passé que 100 livres
baulois excepté le terme de saint Martin 1415 dernier passé.

Au conte Jehan de Tierstain la somme de 400 livres baulois
que feu dame Katherine sa femme li donna à sa vie
durant, à laquelle elles est(o)ient deues chacun an au
terme de Notre Dame en mars sur les rentes
et revenuz de la hale dudit Belfort & n'en est
riens deu de viez (2), comme dit Claulx de Rosemont,
tresourier dessusdit, et n'ont point veu les tiltres lesdits
commissaires, combien qu'ilz en ont escript pour les avoir ou
veoir ; pour ce :: 300 livres baulois.

Aux signeurs de Rope dont ont la cause, quant ad ce de present,
Hennement de Rope, Jehan Orry son frere, dame Katherine
de Rope, femme de messire Jean de Saint Loup, signeur
de Ronchamp, dame Guillemette dudit Ropes, femme Philibert
de Demprez et sa suer, femme de Glaude de Demprez,
escuiers, la somme de 4 livres baulois qui leur sont
deues chacun an à 2 termes par moitié, c'est assavoir en caresme
& en vain, et n'en doit l'on riens de temps passé,
comme dit ledit Claux, et n'ont peu ou voulsu
monstrer leur tiltre ; pour ce :: 4 livres baulois.

(1) la rente de 240 florins pour un capital de 3200 est ainsi de 7,5 %.
(2) de vieux, d'ancien
(3) Jean de Neufchâtel, sieur de Montaigu, gouverneur et capitaine de la seigneurie

Individus relevés :
#1 : Pierre de CLY
#2 : Frene / Verena de TIESTAIN / von THIERSTEIN dame d'Asuel
femme de #1 [veuve de #3]
#3 : (feu) [Hans Ulrich] [d'ASUEL]
#4 : Agnelin de CLY ?
fille de #2, femme de #5
#5 : Holement de MOISONVAL / de MASEVAUX
écuyer ; conjoint de #4
#6 : Jean de TIERSTAIN / von THIERSTEIN
#7 : (feue dame) Catherine / Katharina
femme de #6
#8 : Hennement de ROPE / de ROPPE
#9 : Horry de ROPE / de ROPPE
frère de #1
#10 : dame Catherine de ROPE / de ROPPE
femme de #11
#11 : messire Jean de SAINT LOUP seigneur de Ronchamp
#12 : dame Guillemette de ROPE / de ROPPE
femme de #13
#13 : Philibert de DEMPREZ / de DONCOURT
[d'après un sceau conservé aux AD54, Guillemette, dame de ROPPES, veuve de Philibert de DONCOURT, mort en 1451]
#14 : Claude de DEMPREZ / de DONCOURT
mari de la sœur de #12 [et frère de #13]
Couples relevés :
#1 x #2   #2 x #3   #4 x #5   #6 x #7   #10 x #11   #12 x #13   
(d)
Les mentions entre crochets [...] sont des informations complémentaires à l'acte, fournies par les bénévoles.
Cet enregistrement a été modifié le 26/11/20.
© Lisa90 2001-2024
est référencé dans