Aux hoirs de feu messire Pierre de Cly, chevalier, la somme de 200 frans
à eulx deuz chacun an le jour de la feste de Notre Dame en
mars sur les rentes & revenus de la terre dudit Rosemont,
laquelle rente messrs. les duz d'Osteriche vendirent pieça
audit feu messire Pierre de Cly pour le pris & somme de 200 frans,
et iceulx lui assignerent sur lesdits rentes & revenus,
à paier chacun an perpetuellement audit terme, duquel vendaige
ledit feu messire Pierre leur donna rachat & retrahacion
perpetuel, c'est assavoir que toutes fois que lesdits duz, leurs
hoirs, successeurs ou haiens cause d'eulx paieroient pour
une fois à lui, ses successeurs et aient cause de lui ou temps
adevenir ladite somme de 200 frans, lesdiz duz, leurs successeurs
& haiens cause d'eulx devroient ravoir lesdits 200
frans de rente, et d'iceulx seroient & demeureroient
quictes ; et depuis ledit feu Messire Pierre de Cly ala de
vie à trespassement environ sont huit ans et fuit son hoirs
& heritier seur & pour le tout Jehan de Cly son filz, lequel
d'icelle rente bailla à feu dame Grede de Cly sa
suer, femme jadiz de messire Henry de Rotistof, chevalier,
la somme de 90 frans ; item en bailla à Alebret
Sorer prevost & bourgeois de Moisonvaul 10 frans, et le
residu, c'est assavoir 100 frans bailla à feu Henry de Morimont
& à Jehan de Morimont, escuiers, laquelle feu dame
Grede ala de vie à trespassement environ sont 2 ans
et laissa Loys, Frene & Evelin, pupilles & mo(i)ndres
d'aige ses enffens du corps dudit messire Henry
son mary, ses hoirs & heritiers qui dient à leur
competence à present lesdits 90 frans, lesdits Henry de
Morimont est alé auxi de vie à trespassement et a fait son
heritier universel ledit Jehan de Morimont qui lesdits 100 frans
depuis a donné à Jehanne sa fille, femme dudit Jehan
de Cly en faisent le mariaige d'eulx, et
par ainsint ledit rente compete & appartient de present,
c'est assavoir auxdits Lois, Frene & Evelin enffens
dudit messire Henry de Rotistof, desquelx ledit
messire Henry leur pere a le gouvernement & legitime
administration, 90 frans ; audit Alebret 10 frans et
à la dite Jehanne femme Jehan de Cly 100 frans, auxquelx
dessus nommez, c'est assavoir à ladite Grede & audit Alebret
Sorer & à chacun d'eulx nagaires madite dame
d'Osteriche desdites sommes à eulx deues a faites lettres
particulierement et app... par lesquelles elle confesse
icelles sommes à eulx estre deues sur lesdits
rentes & revenus de Rosemont au terme & par la
maniere que la somme totelle desdits 200 frans estoit deue
audit feu messire Pierre de Cly, parmi lesquelles
lettres les premieres lettres faites par lesdits duz d'Osteriche
audit feu messire Pierre de Cly sont & doivent estre
de nulle valeur en tent qu'il leur (touche ?) et
ont promis de les rendre à ma dite dame
parmi ce qu'elle devoit faire les novelles audit
Jehan de Morimont desdits 100 frans à lui deuz dont
ilz n'ont encoires riens fait, comme
toutes ces chouses ont esté rappourtées aux
ditz commissaires par ledit messire Henry de Rodistorf,
Jehan de Cly & par Claux de Rosemont tresorier
de ma dite dame ; pour ce :: 200 frans.