Charges dues sur les rentes
et revenus desdites chastelleries de Belfort & de Rosemont
cy devant escriptes, données & rappourtées auxdiz commissaires
par Claux de Rosemont jadis tresourier de ma dite dame
èsdiz lieux, et auxi comme il leur a apparu d'aucunes
par copie de tiltres que les (presents ?) en doivent avoir.

Fieds & amousne (1)

À l'ospital de Belfort que feu de bonne memoire dame
Jehanne de Montbeliart marquise de Baudes et
dame desdiz Belfort & Rosemont y donna en amosne
50 livres baulois et 31 bichos par moitié soigle
& avene, mesure de Belfort, à penre & lever
chacun an par la main du receveur dudit Belfort
sur les rentes & revenus de la marie de
Veselay en la chastellerie dudit Rosemont, se tant
pouvoient valoir, et se non, sur le demorant des
rentes & revenus dudit Rosemont, c'est assavoir lesdiz
50 livres à 2 termes en caresme 20 livres & en vain
30 livres, et lesdiz 31 bichos au terme de la saint
Martin d'iver, et dit ledit tresourier que riens n'en est
deu de viez et n'a autrement apparu èsdiz commissaires
dudit don fais par la relacion d'icelli tresourier, combien
qu'ilz ont fait demander par plusieurs fois au maistre
dudit hospital les tiltres ou la copie ; pour ce :: 50 livres baulois,
31 bichos par moitié froment & avene, mesure de Belfort.

À la chapelle dudit Belfort que tient à present messire
Hugues Coulot ..., laquelle fuit fondée par feu de bonne
memoire messire Raoul dit Hosso marchis & signeur
de Baudes, & par feu dame Jehanne de Montbeliart
sa femme, dont dieu ait les ames, de 10 livres de
(cire ?) d'annuel et perpetuel rente, et icelles assignerent
penre & avoir chacun an perpetuellement, c'est assavoir en 5 bichos
de blef, moitié soigle & avene, mesure dudit
Belfort, de leurs dismes, & 5 livres monnoie
courrant sur certains censes nommées & déclairées ès
lettres de la dite fondacion que dés lors furent baillées
& delivrées au chappellain qui y fuit ..., et lesquelles
encoures tient ou doit tenir le chappellain qui
à present y est, lesquelx 5 bichos lesdiz fondeurs
ordonnerent estre levez & paiez entierement chacun an
perpetuellement desdiz dismes au terme de la feste de saint
Michel, comme est apparu èsdiz commissaires par copie
tabellionnée des lettres de la dite fondacion ; pour ce ::
5 bichos par moitié soigle & avene, mesure dudit Belfort.

Au luminaire de l'église parrochial de Belfort que
ledit tresourier dit que ma dite dame d'Osteriche y a
donné 4 livres cire à les prandre & avoir chacun
an tant qu'il le plaira sur les cires qui
sont & seront deues sur le molin de Belfort pour
icelles mectre & commettre oudit luminaire, lequel
font & gouvernent les parrochiens d'icelle et
autrement n'a apparu auxdits commissaires ; pour ce ::
4 livres cire au pois de Belfort.
(1) Fiefs (dans le sens de rente féodale) et aumônes.