Lesdiz habitans de Veselay doivent le banvin qui
dure dés le jour de Noel jusques à la Chandeleur,
ouquel temps ilz doivent vendre ou faire vendre
par une personne qu'ilz eslisent, à leur despens, une
cherrée demie de vin qui font 30 tines & la tine
20 channes que l'en leur doit bailler aux missions
de ma dite dame, et lequel vin ilz sont tenus
de aler querré à leur despens & missions là où
y plait à madite dame ou à ses gens, excepté
que l'en leur doit chargier sur leur chaer, et
doit l'on donner à ceulx qui le vont querré
au chargier un quartaul de vin qui fait 4 channes,
& du pain & auxi les doit l'on esquicter de touz
paiaiges qu'ilz porroient devoir pour mener
ledit vin, et doivent avoir les prudommes qui
eslisent & mectent celli qui vent ledit vin 4 channes de vin, et
jusques ledit vin soit vendu aucun de la dite marie
ne autre ne puet ou doit vendre vin en icelle,
et doit vendre unechacune channe de vin à plus
hault pris de 1 denier que l'on ne vent lors en la
ville de Belfort ou en la terre, et le proffit desdites
30 tines ainsint vendues lesditz habitans doivent
paier & rendre au terme de ladite Chandeleur, et
se y ne plait à ma dite dame ou à ses
gens de bailler ladite cherrée demie de vin, lesdiz
habitans doivent paier pour chacune channe 1 denier
que vaut par an, pour lesdites 30 tines :: 50 sols baulois (1).

Madite dame a en ladite marie ung droit appellé
le langaul qui est que touz vins que l'on
y vent en menu à taverne, celli qui le vent
li doit pour chacun muy 4 channes de vin, et contient
le muy 3 tines & la tine 20 channes, lequel
droit se admodie chacun an au plus offrant, et est
admodié pour cette presente année commenceant à la saint
Ylaire 1415 à Hugues Rapey :: 100 sols baulois.

(1) 600 deniers, soit 50 sols