Les habitans de la dite marie de Vissemont, hommes de ma dite dame,
demourant ès villes qui s'ensuiguent, c'est assavoir Vissemont, au
Puis & Giramaigni, doivent pour leur porcion desdites 400 livres (1)
de taille 48 livres baulois par an, et en font la taille sur
eulx, le fort pourtant le foible, et d'icelles tailles,
pour l'an feni le darrenier jour de decembre 1415
sont les parts escriptes en la fin de ce registre, commenceant folio 65,
lesquelles ont esté baillées èsdiz commissaires par Perrot de
Vissemont, maire desdiz lieux ; pour ce :: 48 livres baulois.

Lesdiz habitans paiens (2) de la dite taille sont 55, et doivent
par an chacun tenant feu, ou qui paie de taille plus de
12 deniers baulois au terme de caresme, une geline, et sont
de present quil ne tiennent point de feu, ou qui ne paient
que 12 deniers par terme, comme appert par les parts dont fait mention
l'article precedent, 5 ; demourent 50, dont chacun doit une geline,
comme dit est ; pour ce :: 50 gelines.
Lesdiz habitans doivent pour la taille ancienne de la giste
des chiens, laquelle ilz font & getent sur eulx, le
fort pourtant le feble :: 16 soubz baulois.

Lesdiz habitans doivent, qui se lieve sur eulx chacun an, au
proffit des gaites qui qui font le gait oudit chastel de
Rosemont, chacun feu une gerbe de blef, c'est assavoir ceulx qui
font gaignaige.

Les explois de justice de la dite marie : les amendes y sont
tout par la forme et maniere que devisé (3) est cy devant
sur le chapitre de la marie de Chaux.

(1) dues par les habitants de la châtellenie de Rougemont
(2) payants (p. présent pris comme adjectif), redevables
(3) deviser = diviser