Cet acte a été dépouillé par l'association LISA (Lecture et Informatisation des Sources Archivistiques du Territoire-de-Belfort)


Type : terrier.
Date : 1416
Cote : B 503
Exposé des droits seigneuriaux dans la mairie de l'Assise : généralités.
Transcription :
Autres rentes, censes, proffis et emolumens de la terre
de l'Assise en laquelle sont les villes qui s'ensuiguent c'est
assavoir Danjustin, Adelenan, Lempe, Monvaul, Severnan,
Chievremont, Fontenelle, Petit Crot, Bassoncourt, Tretoudan &
Doran, lesquelles sont de la chastellerie de Dele et doivent
par an 100 livres baulois, c'est assavoir la moitié en
mars & l'autre en septembre, et doit chacun tenant feug au terme de caresme
une geline, excepté celli qui ne pouvoit paier à chacun terme
plus de 12 deniers, doivent toutes courvées, charrois & commandemens
comme les autres cy après de la chastellerie de Rosemont,
l'ost & la chevauchié, et sont les maires desdites
villes commis desdites tailles, gelines, courvées & autres
servitutes tant comme ilz sont maires, et sont les habitans
desdites villes hommes de ma dite dame de toutes justices,
haulte, moyenne & basse & de condicion telle que ilz ne
puent partir de dessoubz ma dite dame pour aller demorer
en une autre signeuries, et se ilz font le contraire leurs
signeurs les puent aller penre de fait, quelquepart qu'ilz
soient, & radmener dessoubz eulx, et de ce seroient en
la mercy & volonté du signeur, et ont amendes audit lieu
de 7 sols & 32 sols par la forme & maniere que cy après est
devisé (1) sur la chastellerie de Rosemont, delaquelle terre depuis
la saint Jehan Baptiste 1415 les habitans desdites
villes, excepté ceulx de Tretoudan & Doran, sont venuz
à obeissance à ma dite dame, et ont fait le serement en
la main de ses gens, et les habitans desdites villes de
Tretoudan & Doran sont demourez en la main du Roy d'Alemaigne
qui tient à present le chastel de Dele, lequel ilz ont pris et gaigné
sur ma dite dame, et d'icelle terre en ont les officiers
de ma dite dame levé et receu ce que s'ensuit, qu'ilz
doivent au terme & en la maniere cy après escriptes.

(1) deviser = diviser

Aucun individu relevé.
Cet enregistrement a été modifié le 21/10/20.
© Lisa90 2001-2024
est référencé dans