Les habitans de la dite marie où sont les villes qui s'ensuiguent,
c'est assavoir ledit Bavelié & Cravoinche, sont hommes de
Belfort de toutes justices, haulte, moienne & basse, taillables
à volonté deux fois l'en en caresme & en vain, et
doivent chacun tenant feu & paient taille à caresmentrant
une journée toutes courvées, la monstre des hommes, l'ost
et la chevauchée, et pourter lettres toutes fois que
l'on leur commende, et souloient estre de morte
main, de laquelle ilz sont affranchiz avec ceulx
de la marie de Chastenoy, ainsint & par la maniere
que contenu est ou premier article de la marie de Chastenoy,
cy devant, folio 10, et ont acoustumé de paier
de taille par an 32 livres baloises par moitié èsdiz termes
de caresme & de vain, et pour les parts escriptes cy après
folio     , pour ce, pour lesditz termes d'un an :: 31 livres 10 sols balois.

Et pour leur gelines & sont 28 paiens (1) d'icelles
tailles dont les 12 ne tiennent point de feu, pour
ce, pour le resdu et sont 16 tenant feu, et appert
par lesdites parts :: 16 gelines.

La justice de ladite marie est gouvernée par le maire
dudit lieu, et y sont les emendes de 7 sols, 36
sols & 72 sols, tout par la forme & manière
que contenu est cy devant ès autres maries
de la terre et chastellerie dudit Belfort.

Les habitans de ladite marie doivent avec les autres habitans
des maries de la dite terre dudit Belfort le bois pour
affouer & chauffer ou chastel dudit Belfort le signeur
ou son capitaine demeurant en icelli, et en ont paié
pour l'an passé feni 1415 touz ensemble 50 livres baloises.
Item doivent les habitans de Bavelié, tant les hommes
dudit Belfort, comme les hommes des autres signeurs demeurant
en icelle pour la taille des chiens qui paient chacun
an à Noël et ne croit ne descroit :: 7 sols estevenants.

(1) payant (payeurs)