Cet acte a été dépouillé par l'association LISA (Lecture et Informatisation des Sources Archivistiques du Territoire-de-Belfort)


Type : terrier.
Date : 1416
Cote : B 503
Exposé des droits seigneuriaux en la mairie de Châtenois (I)
Transcription :
La marie de Chastenay en la chastellerie de Belfort

Les habitans de ladite marie où sont les villes qui
s'ensuiguent : ledit Chastenay, Bervon (1), Oyes, Vervenans,
Dempierre, Bonstans, Braignart, Villars le Sec et
Nuefmex sont hommes de ma dite dame, de toutes
justices haulte, moyenne & basse, taillables à
volonté deux fois l'an en caresme & en vain, et
doit chacun tenant feu & paient desdites tailles, se la
taille passe pour paiement 12 deniers chacun an, à caresme
une geline, toutes courvées, les monstres des hommes,
l'ost & la chevauchée, & pourtent lettres toutes fois que l'en
leur commede, et souloient estre de morte main,
et aussi ceulx de Bavelié & de Cravoinches, de la
quelle ilz furent jà pieça affrainchiz par feu dame
Alips marquise de Baudes & dame de Belfort (2), par
ainsint que de ceulx de ses hommes qui trespasserent,
desquelx les eschoites à cause d'icelle morte main
le deussient advenir avant ledit affrainchissement,
elle & ses successeurs avoient en chacune eschoite qui
ainsin viendroient la meilleur beste de l'ostel, le
meilleur meuble ou 5 sols estevenants, lequel que mieux le
plairoit à elle & à ses successeurs, ou à leur commendants,
pour tel aussi que se aucuns de ses subgez des
lieux dessus diz trespassoient senz heritiers qui n'eussient
parens ou prouche de lignaige en la terre de la dite
dame & de sa signorie, l'eschoite retourneroit à elle
& ses successeurs pour le droit de la dite morte main,
comme par avant, comme a apparu par la copie tabellionnée
de certaines lettres que les habitans desdiz lieux dient avoir
sur ce de la dite dame, et ont acoustumé de paier
de taille par an 44 livres, par moitié en caresme et en
vain, pour ce, pour lesdites tailles & sont les parties
escriptes ci après, folio 63, les parties baillées par Felix Maire,
maire dudit lieu :: 44 livres baloises.

Et pour lesdites gelines, pour 33 paient desdites
tailles, dont les 3 ne tiennent point de feu & pour
ce n'en doivent riens, & demeurent 30 qui doivent
chacun 1 geline ; pour ce :: 30 gelines.

Le droit deu en la dite marie, en lieu & pour ladite
morte main dont ilz ont estez affrainchiz comme
dit est, qui est appellé le (vot ?), lequel est
plusaplain declairé cy devant ou premier article de
ceste marie ; a vaillu pour une femme appellée Jehannete,
femme Moillot qui c'est furmariée et doit le droit
devant dit, comme se elle feust trespassée, pour le formariement,
comme l'ont rappourté le maire & plusieurs des personnes desdits
lieux, laquelle n'avoit beste ne autre meuble mieux
vaillant de 5 sols que l'on peust penre, comme raison
& la coustume est, et pour ce l'en a levé d'elle lesdiz
5 sols ; pour ce :: 5 sols estevenants.

Les habitans de ladite marie doivent avec les autres habitans
de la terre dudit Belfort le bois pour affouer le
chastel dudit lieu dont ilz ont acoustumé de paier
pour 1 an touz ensemble 50 livres baulois.

(1) Bermont.
(2) Alix Adelaïde de Bade (1325 - ~1372), fille de Rudolf Hesso de Bade et de Jeanne de Montbéliard, héritière d'une partie de la seigneurie de Montbéliard ; cf. Sempach

Individus relevés :
#1 : (feue dame) Alips / Alix de BADE / de BAUDES marquise de Bade
dame de Belfort
#2 : Jeannette
femme de #3
#3 : MOILLOT
extérieur à la seigneurie
Couple relevé :
#2 x #3   
Cet enregistrement a été modifié le 01/07/22.
© Lisa90 2001-2024
est référencé dans