Les dismes du finaige & territoire dudit Belfort sont à ma
dite dame, et les recuille l'on aux chans à ses missions,
& prant l'on de 11 gerbes l'une, et les a l'on acoustumé de
admodier chacun an, et cellui qui les admodie les met là
où bon lui semble, à ses missions, et furent admodiées, pour
les moissons darenieres passées mil 4c 15, 14 bichos, par moitié blef gros frement
& avene, mesure de Belfort, que l'on a acoustumé de paier
entre la saint Martin d'iver & Noël. Sur lesquelx
dismes est deu au chappellain de la chapelle du
chastel de Belfort 6 bichos par moitié blef dessudit
qu'il prant par la main du receveur dudit lieu ; pour
ce : tourte :: 7 bichos gros frement
et avene :: 7 bichos avene mesure de Belfort

Madite dame a audit lieu de Belfort les bois qui s'ensuivent.
C'est assavoir le bois d'Arssot, le bois de la Fourest Bas les
Loies, le bois de Bars, & le bois du mont de Crevoinche,
et sont bois de haulte fourest, pourtans glan et
fene quant la saison le rappourte, et pour tout emmende
sur les hommes de ma dite dame, & sur tous autres
que l'on y tienne coupant bois en iceulx, c'est assavoir pour
le foul, poirer & pommier 72 sols estevenants, dont les 60 sont à
ma dite dame et les 12 sont au fourestier, et pour le chesne
36 sols estevenants, dont ma dite dame a les 30 et le fourestier
les 6, & pour autres bois 7 sols estevenans, dont ma dite dame
a les 4 sols & le fourestier les 3, et toutefois que paisson
y est les habitans dudit Belfort, des Illes (?), Offemont, Vadoie
& de Cravoinche puent mener leurs pors en paisson,
(pour) paient pour chacun porc de leur norry 2 deniers estevenant
excepté que se il y avoit aucune trulce (truie) qui eust
pourceaulx après elle, les 2 ne soient comptés que pour
1, et d'autres pors qui ne seroient point de leur norry
& qui seroient achetez puis la Magdeleine (1), ilz devront
pour chacun 12 deniers estevenants, et se paie ledit paissonnage entre
la Saint Martin d'iver & Noël, ouquel temps le compte
se fait par le serment des gardes desdiz pors, et ne
porroit madite dame vendre la paisson d'iceulx
bois, et y ont lesdiz habitans le mort bois excepté
ceulx de Beaufort qui n'en y ont point, et y a
aussi ledit mort bois celli qui admodie le four dudit
lieu, pour affouer ledit four.

Madite dame a en la prarie dudit Belfort, sur la riviere,
desobz le chastel une piece de prey appelé le prey
du chastel, contenant environ 6 fauchees, assis entre la riviere
& la montaigne, et dit le tresourier qu'il ne scet pas
qu'ilz feussient onques venduz, mas l'erbe d'iceulx
a esté chacun an recuilli par les chastellains dudit Belfort
et dit que l'erbe pour 1 an puet valoir environ 2 sols ;
pour ce :: 2 sols

(1) puis la Magdeleine : après la ste Madeleine