Et aussy que ledit chastel de Belfort et en très petit
estat, tant de la cloison d'icelli comme des maisons, car
lesdiz murs sont depeciez & desroichez en plusieurs lieux.
Lesdites tours, c'est assavoir la grosse tour qui fait dongeon
est au costey devers le vent toute gastée, car les murs
d'icelle, dés le dessus jusques au dessoubz audit costel sont
touz pourriz pour le batement des pluies, et est le toit
d'icelle en malvais estat car il pluet partout, les
maisons par deffault sont très mal couverte et pour deffaut de
couverture sont les souliers pourriz, & sont les aucunes
à l'avanture de cheoir à terre, se remede n'y estoient briesvement
mis.

Le chastel de Rosemont est en très pouvre & petit estat
& a esté ars & brulez n'a pas long temps, toutes voyes
l'en a reffait le toit de la saule [salle ?] qui n'est pas encoires
acomplie de couverture, & est ja le marrien (avoult ?) empirié
& en avanture de cheoir à terre ; touz les murs de la dite
saule sont pourriz & gattez, qui y a esté ; et sont en plusieurs
lieux desroichiez ; et n'y a aucune chouse qui vaille ; et est
à l'avanture de bientost cheoir et venir à terre ; et qui
la vouldroit remettre en estat y semble qui faudroit commencer
à mettre à terre, & le faire tout à nuef, car reparacion (mouves ?)
n'y pourroient gare aidier ne profiter pour les murs qui
sont ainsint gaitez du feul comme dit est ; et n'a audit
chastel aucun bien meuble qui soit à mondit sr. ne à
ma dite dame, comme dit Jehan de Colour, chastellain à present
dudit chastel, et aussy y a peul d'autre biens et est
ung très pouvre lieu de toutes chouses.