Item quiert ledit mre bourgeois luy estre passez
la somme de vingte trois libvres dix sept solz
et huict deniers ballois pour missions
et despens que furent faitz alors que messieurs
les vouhairdz et tuteurs des sieurs de cedit
lieu vindrent prendre possession de la
seigneurye pour et en nom desdits seigneurs
la sepmainne de la Purification
nre Dame, tant le lundy que messieurs
du conseil furent ensemble et qu'ilz
serchirent ou secrey de la ville
les lectres des precedantz serrements que
les sieurs antecesseurs dudit Belfort avoient
euz faict à la ville, avant que de jurer
esdits sieurs tuteurs, ensemble d'aultres
lectres desdommaigeables à cause de
la plaigerye faictes à la ville par
les sieurs de Morimont pour icelles faire
renouveller et reconfermer là où que messieurs
de la commune furent mandez pour scavoir
l'oppynyon d'ung chacun, et les advertir
des mandements qu'estoient venuz de par
messieurs les regentz d'Enguessey pour et en
nom de sa maiestez, aulquel jour
que dessus messieurs les bourgeois furent mandez
par plusieurs foys par lesdits sieurs vouhairdz et
tuteurs et mesmes le lendemain suigant
à cause qu'ils ne pouvoient venir
d'accord que en premier lieu lesdits sieurs n'eussent
à jurer et promectre de maintenir et
entretenir la ville & lesdits bourgeois
et habitations en leurs bonnes et anciennes
coustumes, libertez et franchises escriptes
et non escriptes, et est en ce y comprins
six vingtz et trois pintes de vin que furent
données à messieurs de la commune après
avoir estez faict ledits serrement, ensemble
des missions du mercredy suigant que messieurs
du conseil semondirent lesdits sieurs vouhairdz
en la maison de la ville, et aussy
deux channes de vin que messieurs les bourgeois
leur envoyerent en la maison Jehan Besançon
quant ilz furent arryvez et mesmes les
missions que furent faictes, tant par messieurs du
conseil que par plusieurs de la commune,
tant en gardant monsieur Hugue de Fridingen
qu'estoit l'ung des vouhaird desdits seigneurs
que le marcsalct d'Enguessey avoit prins
prisonnyer au nom de messieurs les regentz,
lequel fut mys en arroy en la maison
de la ville, et depuys, mener au lieu
de Thann par ledit marcsalct avec
treize compaignons de la ville quy
furent esleu à luy faire assistance (...)