Lesdiz habitans donnent à ma dite dame censes sur leur
maisons & chasauls en ceste manière et est assavoir que les
toises de leurs maisons & chasaulx, à mesurer au
frond devant doit 20 deniers estevenans, et doit contenir la
toise 10 piez, ainsin doit le pié 2 deniers estevenans, et se
doit paier à deux termes par moitié, c'est assavoir
à la feste de l'annonciacion Notre Dame Vierge, et à
la Saint Remi, et celli qui ne paie èsdiz termes
l'en le puet gaiger & excecuter ses biens, ou hoster [ôter]
les huisseries de son hoster [hôtel], et se il les remet

senz licence il est amendable à ma dite dame de 60 sols, et
d'icelles toises Messire Hugue Briot, darnier receveur
dudit Belfort a baillé les parts qui sont cy après escriptes commencent
folio 50 ; lesquelles montent, en oultre plusieurs maisons
& chasaulx vacquans, pour 1 an entier à 9 livres, 4 sols
6 (deniers ?) estevenans, pour ce :: 9 livres, 4 sols 6 (deniers ?) estevenans.

Et est assavoir que ceulx qui deffaillent de paier
pour le terme de 3 ans, les maisons & chasaulx des
deffaillons sont acquis à ma dite dame & en puet faire
son plaisir.

Item est vray que en la dite ville, a plusieurs maisons
qui sont emprez es murs de ladite ville qui denient
les toises semblablement, lesquelles souloient estre & appartenir
aux signeurs dudit Belfort, et de present les tient
Jehan de Morimont, escuier, qui nagaires les a prises
en gaige de Jehan Gadaichet, bourgois de Monbeliart
qui les a tenues & levées par longtemps, & n'ont pas
trouvé lesdiz commissaires la cause est, dont les precisionts
escriptes cy après commencent folio 54, et pour
savoir la verité, lesdiz commissaires ont mandé ledit
Gadaichet, qui pour ceste cause a esté devans eulx
mais ilz n'a voulsu monstrer tiltre, ne dire
cause raisonnable comment lesdites toises li
appartiennent, et pour ce, à la requeste dudit receveur
de Belfort, ycelles ont esté mises à la main
de ma dite dame par le prevost dudiz Belfort
qui la dite main mise a signiffié audit Jehan
Gadaichet comme ilz ont relaté.